وە مدوو ئەوە گ زوان کوردی ڤە باکور و ترکیە هویچ جاێ ڤە بێن نەدریاسێ و ڤە ژێر زەخت و ڤەربەستەل ڕامیاری، گەل کورد نمەتوێنێ وە زوان وژی پەروەردە بوینێ. هەر ڤە ئێ هۆکارە فرە ئەژ کوردەل ڤە باکور و ترکیە نمەتوێنن وە زوان وژان بخوەنن و بنویسن. هەر ئێجوورە وە مدوو سیاسەتەل تاواننەوە و ئاسمیلاسیۆن ک وە شێوەی سیستماتیک وە دەس دەولەت ڤەڕێیە مەچوو، بڕێ ئەژ کوردەل زوان وژان نمەزانن. هەر وە ئێ هۆکارە هەرچێ ڤەرەو نوا مەچیمن قسەکردن وە زوان کوردی ڤە ماڵەل و ڤە دەردەشت کەمە ماوا.
ئەگەر نوا ئێ ئاراستە نەگیررێ، زوان کوردی ڤە باکور و ترکیە مەکەوێیەێ نام دوخ و ڕەوش مەترسیدارترێ. کوومەڵەی ئەرنکۆلینەل کوردی وە ئامانج دورسکردن هۆشیاریی ڤە بان ئێ ڕەوشە، کارەلێ جوور کۆنفرانس، پانێل، سمینار و کۆمخەباتەل ڤەڕێیە مەورێ؛ کارگال فێرکردن خوەنن و نویسین کوردی و فێرکردن زوان کوردی ڤەڕێیە مەورێ؛ پشتگیری ڤەشیاێنەل کوردییە مەکەێ و وژیج ڤەشانە مێیەو دەر.
