Kürtçe Online Ders Kayıt Formu ,Forma Dersên Kurdî yên Online

Kovare

Zend


Kovara Zende kovaranê verên ra yew a ke warê cigêrayîş û îlmî de Vakur de vejîyaye. Zende bi dergîya emrê xo yê weşanî de meymandarîya xeylê roşinvîranê kurdan kerdo û bîya cayê munaqeşeyanê îlmîyan ê ziwan, edebîyat, tarîx û kulturê kurdan ser o.

Zend reya verêne serra 1994î de di hûmareyê aye sey hûmareyanê ceribnayîşî vejênê. Badê serra 1996î de bi tewirêko perîyodîk dest bi vejîyayîşî kena û heta 1998î 6 hûmareyê aye vejênê. Verba şert û mercanê ê wextî 6 serrî beyntar keweno weşanê Zende û serra 2004î de reyna vejêna. Serra 2004î de verba tayê meseleyanê resmî, statuyê aye kovare ra beno rêzekitab. Serra 2004î ra heta nika 26 hûmarî vejîyayî. Zende serra 1994î ra heta nika 34 hûmar vejîyaya. Zende hema zî hetê Enstîtuyê Kurdan yê Îstanbulî ra serre de di hûmar yena vetene. Hûmareyêka aye wisarî de û ya bîne zî payîzî de yena vetene.

Fêrname


Enstîtuyê Kurdan yê Îstanbulî serra 2014î de seba mamosta û wendekaranê xo bi nameyê “Fêrname” kovarêk vejêno. Kovare de berhem û nuşteyanê wendekar û mamostayan rey de, nuşteyî der heqê kultur û hunerê kurdkî zî ca gênê. Kovare de seba banderkerdişê ziwanê kurdkî çalakî û der heqê metodanê banderkerdişî zî nuşteyî ca gênê.

Kesê ke newe banderê ziwanê kurdkî benê, şênê bi hetkarîya na kovare wendişê xo aver berî û kultur û edebîyatê kurdan nas bikî. Babetî sey burc û xaçepers zî kovara Fêrnameye de ca gênê. Nuşteyî bi hîrê lehçeyanê kurdkî (kirmanckî, kurmanckî û sorankî) kovare de estê. Mamosta û wendekarê kurdkî şênê na kovare ra îstifade bikerî, hem zî bi nuşteyanê xo şênê piştî bidî kovare. Heta nika 4 hûmareyê kovara Fêrnameye vejîyayî. Hûmara çarine ra pey formatê Fêrnameye ame vurnayene û nika ra pey tena do metnê wendişî tede bibî. Nê metnî zî do goreyê duştê yewinî, dîyinî û hîrêyinî bibî. Fêrname serre de 2 hûmarî vejêna. Hûmarêka aye wisarî de ya bîne zî payîzî de yena vetene.