Kürtçe Online Ders Kayıt Formu ,Forma Dersên Kurdî yên Online

SAZÎYANÊ ZIWANÊ KURDKÎ RA BEYANATÊ ÇAPEMENÎYE SEBA POLÎTÎKAYA TURK TELEKOMÎ



Sazîyê ziwanê kurdkî polîtîkaya qedexekerdiş û sansûrkerdişê ziwanê kurdkî yê Turk Telekomî şermezar kenî

Seba raya pêroyî,

Sey sazîyê ke seba ziwanê kurdkî xebat kenî, ma lazim dî ke ma raya pêroyî o muameleyo ke yew xebatkarê Turk Telekomî verba ziwanê kurdkî nîşan dayo û badê zî polîtîkaya înkarker a ke Turk Telekom sey sazîyêk verba ziwanê kurdkî netîceyê na hedîseye de vejîyayo werte, na hedîse ra xeberdar bikî.

Badê awanbîyayîşê netewe-dewletê ke Kurdistan ser o îqtîdar ê, polîtîkayê asîmîlasyonîst û çinkerdişî yê verba ziwananê şaranê ke bin îqtîdarê nê dewletan de yê, zêdetir benî. Hema çend hefte nika ra ver, qezaya Sûra Amede de hetê jendermeyan ra wendişê mewlûdê kurdkî amebî astengkerdene. Nê rey de, dewleta Îranê zî seba her serrêda musnayişê ziwanî kurdkî, serrêk cezaya zîndanî û bi pêroyî 10 serre cezaya zîndanî seba mamosteyêka ziwanê kurdkî birnaye. Nê hedîseyî nîşan danê ke polîtîkayê astengkerdiş, qedexekerdiş û krîmînalîzekerdişê ziwanê kurdkî hema zî dewam kenê.

Her sazî û kesê ke waşto verba na polîtîkaya asîmîlasyonîst bivejîyo, bi maneyanê cîya cîya yê sey “tehrîk û teşwîqkerdişê şar verba dewlete” rastê teda ameyî û înan rê cezayî ameyî birnayene. Her na maneya ke ma qalê ci kerda, çi tesaduf o ke îzehetê Turk Telekomî de zî xo nîşan da ke raya pêroyî ey sey sazîyêde bazirganî zanî û o bi xo zî îdîa keno ke “bi dergîya emrê xo yê 180 serrî qet cîyayî beyntarê dîn, ziwan û nijadan de nêronayo”. Eger rasta zî na îdîaya nê sazîyî rast bo, çirê Turk Telekom îzehetê xo de qet nameyê kurdkî nêvîyarnayo û heta nika zî qet xizmetêde xo bi ziwanê kurdkî nêviraşto ke 30 mîlyon kurdî warê ey yê xizmetê de pey qisey kenî?

Na hedîse reyna nîşanê raya pêroyî da ke polîtîkaya înkarkerdiş û qedexekerdişê kurdkî çi hetê sazîyanê bazirganîyan ra bo çi zî hetê sazîyanê resmîyan ê dewlete ra bo hema zî estê.  Ma sey sazîyanê ziwanê kurdkî na polîtîkaya qilêr şermezar kenî.

Bi na minasebete ma reyna şarê xo û raya pêroyî yê Tirkîya na polîtîkaya înkarker û qedexeker ra xeberdar kenî û sazîyanê bazirganîyan û resmîyan ûsb. ra teleb kenî ke xizmetê bi kurdkî zî pêşkêş bikî û zaf-ziwanîyêk goreyê rastîya warê xebatanê xo bidî xo ver.

SAZÎ:

  1. AVESTA Komeleya Lêkolînên Çand û Ziman
  2. Komeleya Lêkolînên Kurdî
  3. Komeleya Lêkolînê ya Ziman û Çandên Mezopotamyayê
  4. Komeleya Lêkolînên Ziman, Çand û Hunerê (Dîsa-Der)

2020-08-24 10:28:42

Twitter