جارنامە زەندی یو چا جارنامانەن کە جە بەشوو پەیجۆری زانستی جە سەرنیشتوو کوردستانی وەلا کریانەوە. زەند جە ماوەو ئەدەبی وێشەنە فرە کەسێ پسۆ رووناکویرا، نویسەرا، هۆنیارا و... سەر کەردێنێوە، هەر پاسە فرە بابەتێ زانستی، ئەدەبی و تاریخییەش چەنە نویسیەنێ. زەند یەکەم جار جە سالەو ١٩٩٤ دوێ شمارێش پسۆ تاقی کەردەیۆ چەنە چاپ کریە. دماو ئانەیە جە سالەو ١٩٩٦ تا ١٩٩٨ شش شمارێش چەنە چاپ کریە. بە بۆنەو ئاژەو خرابوو ئا سەردەمەیە شش سالێ بەین گنۆ سەروو چاپیش و جە ساڵەو ٢٠٠٤ جارێ تەر دیسان جە نۆ چاپ کریۆوە. هەر چا ساڵەو تا ئیسە فرەو بابەتەکا جارنامەو زەندی پسۆ وردە کتێبی چاپ کریەنێ. جە سالەو ٢٠٠٤ ی تا ئیسە ٢٦ شمارێش چەنە چاپ کریەنێ پانیشا کە جە سالەو ١٩٩٤ی چاپ کریەنێ یاوا ٣٤ دانێ. گرد سالێ دوێ شمارێش چەنە چاپ کریا، یۆ جە وەهارەنە و ئەوی تەرشا جە پائێزەنە..

ئەنستیتوی کوردی ئستانبۆل جە ساڵەو ٢٠١٤ پێ مامۆساکا و وانیەرەکاش گۆڤارێ بە نامێ "فێرنامە"یش چاپ کەردەن دلێ گۆڤارەکەینە جگە جە نویستەکا وانیەرەکا و مامۆستایەکا، نوویستێ سەروو کەڵتوور، زوان و فەرهەنگی کوردی چەنەش چاپێ با. پا بۆنەوە فرەو وانیەرا جە ڕاو جارنامەکەیۆ فێروو زوانی بێیەنێ و تاوا بنویسا و واناوەو و کەڵتوور و ڕانویسوو کوردی بژناسا. پێ سەرنجداو وانیەرا بابەتێ پسۆ چوارخشتەو پەرسای ( جەدوەڵ ) جە دلێ جارنامەکەینە یاگێش گێرتێنە. بابەتێ بە هەر یەرە زاراوەکا (کرمانجکی، کورمانجی و سۆرانی) جە جارنامەکەنە منویسیا. مامۆستاکێ و وانیەرەکێ بە نویستەو بابەتەکا وێشا تاوا پی ڕێ خزمەتوو جارنامەکەی کەرا. تا ئیسە ٤ شمارێش چەنە چاپ کریەنێ. جە دماو شمارە ٤ی فۆرموو جارنامەو فێرنامەی واریا و ئا مەتنێ و نویستێ پێ چاپی هۆرچنیا بە پاو پڵێ یوهەمین، دوهەمین و یەرەمین ریکوزیا. شمارێوەش جە وەهاروو و شمارێ تەرش جە پائێزەنە چاپ و دریۆ بەر